(ភ្នំពេញ)៖ លោក ឃឹម ស៊ុនសូដា អភិបាលខណ្ឌកំបូល បានចាត់ឱ្យក្រុមការងារពាក់ព័ន្ធខណ្ឌ-សង្កាត់ និងភូមិបន្តសហការចុះជួសជុលផ្លូវទាំងឡាយណា ដែលរងការខូចខាតនូវមួយអន្លើ និងកើតជាជង្ហុក (សំបុកមាន់) ដើម្បីបង្ការទប់ស្កាត់កុំឱ្យខូចខាតធ្ងន់ធ្ងរមួយផ្នែក និងមួយផ្នែកទៀត ដើម្បីបង្ការគ្រោះថ្នាក់កើតឡើងជាយថាហេតុផ្សេងៗ ពិសេស ជួយសម្រួលដល់ការធ្វើចរាចរណ៍ងាយស្រួលជាងមុន សម្រាប់បងប្អូនប្រជាពលរដ្ឋ។

សម្រាប់ផែនការ ដែលក្រុមការងារខណ្ឌ-សង្កាត់ និងភូមិបានសហការរៀបចំធ្វើ និងអនុវត្តឡើងតាមការដឹកនាំបញ្ជាពីសំណាក់ លោក ឃឹម ស៊ុនសូដា នេះគឺចាប់ពីផ្លូវមុខ៩១១ រហូតដល់វត្តតាភេម ស្ថិតក្នុងភូមិតាភេម សង្កាត់កំបូល ខណ្ឌកំបូល រាជធានីភ្នំពេញ នាព្រឹកថ្ងៃសុក្រ ១០កើត ខែកត្តិក ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី៣១ ខែតុលា ឆ្នាំ២០២៥។

បើតាមលោកអភិបាលខណ្ឌកំបូល បន្ទាប់ពីរដូវវស្សាឆ្នាំនេះ រដ្ឋបាលខណ្ឌនឹងមានវិធានការជាបន្តបន្ទាប់ ក្នុងការបន្តធ្វើការជួសជុល និងកែលម្អចំពោះផ្លូវទាំងឡាយណា ដែលរងការខូចខាតនូវមួយអន្លើ ដោយប្រើប្រាស់ប្រភេទកៅស៊ូត្រជាក់សម្រាប់ជួសជុលផ្លូវកៅស៊ូ និងផ្លូវបេតុង ម៉ាក FAST FIX ក្រោយពីធ្វើការចុះតាមដាន និងត្រួតពិនិត្យវាយតម្លៃ ជាក់ស្ដែងឃើញ ថាផ្លូវទាំងនោះ ពិតជាមានជង្ហុគតូចធំ ដែលកើតជា (សំបុកមាន់)៕