ខ្លាសអាស៊ីធីវី

រដ្ឋបាលខណ្ឌសែនសុខ ទុកពេល៣ថ្ងៃឱ្យរុះរើតូប និងយកសម្ភារចេញ សម្រាប់អ្នកប្រកបអាជីវកម្មនៅអមសងខាងលើចិញ្ចើម និងទ្រូងផ្លូវចូលវិទ្យាស្ថានជាតិបណ្តុះបណ្តាលបច្ចេកទេស ក្នុងភូមិចុងថ្នល់ខាងលិច និងភូមិបុរី១០០ខ្នង សង្កាត់ទឹកថ្លា

ព័ត៌មានជាតិ

(ភ្នំពេញ)៖ លោក ចេង មុនីរ៉ា អភិបាល នៃគណៈអភិបាលខណ្ឌសែនសុខ នាថ្ងៃទី២៦ ខែវិច្ឆិកា ឆ្នាំ២០២៥ បានចេញសេចក្ដីជូនដំណឹងមួយ ដោយជម្រាបជូនដល់បងប្អូនប្រជាពលរដ្ឋ ដែលបាននិងកំពុងប្រកបអាជីវកម្មនៅអមសងខាងតាមបណ្តោយផ្លូវចូលវិទ្យាស្ថានជាតិបណ្តុះបណ្តាលបច្ចេកទេស (ចាប់ពីមហាវិថី សហព័ន្ធរុស្ស៊ី ដល់វិទ្យាស្ថានជាតិបណ្តុះបណ្តាលបច្ចេកទេស) ស្ថិតក្នុងភូមិចុងថ្នល់ខាងលិច និងភូមិបុរី ១០០ខ្នង សង្កាត់ទឹកថ្លា ឱ្យបានជ្រាបថា៖

បច្ចុប្បន្ននេះ រដ្ឋបាលខណ្ឌ ពិនិត្យឃើញថា បងប្អូនប្រជាពលរដ្ឋ និងអាជីវករមួយចំនួន បានសាងសង់តូប និងដាក់សម្ភារផ្សេងៗលើចិញ្ចើមផ្លូវសម្រាប់ថ្មើរជើង និងប្រើប្រាស់ទ្រូងផ្លូវជាចំណតសម្រាប់កង់-ម៉ូតូ-រថយន្ត រួមទាំងបង្ហូរទឹកកខ្វក់ និងបន្សល់កាកសំណល់លើទ្រូងផ្លូវ ដែលបណ្តាលឱ្យបាត់បង់សណ្តាប់ធ្នាប់ របៀបរៀបរយ អនាម័យ បរិស្ថាន និងកកស្ទះចរាចរណ៍ប៉ះពាល់ដល់ការធ្វើដំណើរបស់ប្រជាពលរដ្ឋទូទៅ។

ដូចនេះ ដើម្បីឱ្យមានសណ្តាប់ធ្នាប់ របៀបរៀបរយ អនាម័យ សោភ័ណភាពស្អាតល្អ និងសម្រួលដល់ការធ្វើចរាចរណ៍ របស់បងប្អូនប្រជាពលរដ្ឋ រដ្ឋបាលខណ្ឌ សូមណែនាំឲ្យបងប្អូនប្រជាពលរដ្ឋ ដែលបាននិងកំពុងយកចិញ្ចើមផ្លូវ និងទ្រូងផ្លូវ ដើម្បីប្រកបអាជីវកម្ម ត្រូវធ្វើការរុះរើតូប និងយកចេញនូវសម្ភារផ្សេងៗ ដែលបា ដាក់លើចំណីផ្លូវសាធារណៈ ឲ្យអស់យ៉ាងយូររយៈពេល០៣ថ្ងៃ ចាប់ពីថ្ងៃជូនដំណឹងនេះតទៅ។

ក្នុងករណីបងប្អូនមិនអនុវត្តតាមការណែនាំខាងលើ រដ្ឋបាលខណ្ឌនឹងអនុវត្តវិធានការតាមនីតិវិធីច្បាប់ និងអនុវត្តវិធានការរដ្ឋបាល ដោយមិនទទួលខុសត្រូវលើការខូចខាត ឬបាត់បង់សម្ភារ និងទ្រព្យសម្បត្តិរបស់បងប្អូនឡើយ។

រដ្ឋបាលខណ្ឌសែនសុខ មានជំនឿជឿជាក់យ៉ាងមុតមាំថា បងប្អូនប្រជាពលរដ្ឋទាំងអស់ ដែលបាននិងកំពុងប្រកបអាជីវកម្មនៅអមសងខាងបណ្តោយផ្លូវចូលវិទ្យាស្ថានជាតិបណ្តុះបណ្តាលបច្ចេកទេស (ចាប់ពី មហាវិថីសហព័ន្ធរុស្ស៊ី ដល់វិទ្យាស្ថានជាតិបណ្តុះបណ្តាលបច្ចេកទេស) ចូលរួមអនុវត្តដោយស្មារតីទទួលខុសត្រូវខ្ពស់៕

https://api.whitetigertv-asia.com/uploads/images/1764167680748-photo_2025-11-26_21-33-38.jpghttps://api.whitetigertv-asia.com/uploads/images/1764167715953-photo_2025-11-26_21-05-09.jpghttps://api.whitetigertv-asia.com/uploads/images/1764167715955-photo_2025-11-26_21-05-16.jpghttps://api.whitetigertv-asia.com/uploads/images/1764167715955-photo_2025-11-26_21-05-22.jpghttps://api.whitetigertv-asia.com/uploads/images/1764167715959-photo_2025-11-26_21-05-28.jpg

អត្ថបទ៖ ដូរបាយ
ប្រភព៖ ស្រាវជ្រាវ
ចែករំលែក
ខ្លាសអាស៊ីធីវី