(ភ្នំពេញ)៖ លោក ថេង សុថុល អភិបាល នៃគណៈអភិបាលខណ្ឌ៧មករា បានអញ្ជើញជួបសំណេះសំណាល និងសួរសុខទុក្ខ អំពីការប្រកបមុខរបររកស៊ីទទួលទានចិញ្ចឹមជីវិតប្រចាំថ្ងៃ ចំពោះបងប្អូនអាជីវករតាមតូបលក់ដូរផ្សេងៗក្នុងផ្សារអូរឬស្សី ក្នុងគោលបំណងដើម្បីស្វែងយល់ និងចង់ដឹងពីបញ្ហាប្រឈមផ្សេងៗតើមានអ្វីខ្លះ ដើម្បីរិះរកដំណោះស្រាយតាមស្ថានភាពជាក់ស្ដែង។
សកម្មភាពជួបសំណេះសំណាល និងសួរសុខទុក្ខចំពោះបងប្អូនអាជីវករលក់ដូរ និងឆ្លៀតឱកាសត្រួតពិនិត្យផ្នែកខ្លះនៃការជួសជុល និងកែលម្អទាំងផ្នែកខាងក្រៅ និងខាងក្នុងបរិវេណផ្សារអូរឫស្សី ពីសំណាក់លោកអភិបាលខណ្ឌ៧មករានេះ ក៏មានការចូលរួមអមដំណើរដោយគណៈកម្មការផ្សារ និងមន្ត្រីថ្នាក់ដឹកនាំខណ្ឌ-សង្កាត់ និងបានធ្វើឡើងនារសៀលថ្ងៃទី២៧ ខែវិច្ឆិកា ឆ្នាំ២០២៥។
បើតាមលោក ថេង សុថុល ចំពោះការបន្តចុះត្រួតពិនិត្យលើការងារជួសជុល និងការកែលម្អផ្សារអូរឬស្សីនេះ បានធ្វើឡើងក្នុងគោលបំណង ដើម្បីបង្កលក្ខណៈងាយស្រួល សម្រាប់អាជីវករលក់ដូរ និងភ្ញៀវចេញចូលទិញឥវ៉ាន់ និងសម្ភារផ្សេងៗ ទាំងខាងក្រៅ និងខាងក្នុងបរិវេណផ្សារ ហើយសំខាន់ ការរៀបចំសណ្ដាប់ធ្នាប់ របៀបរៀបរយ និងអនាម័យ បរិស្ថាន ដូចជា នៅតាមតូបនិមួយៗ ចាំបាច់ត្រូវទុកផ្លូវសម្រាប់ដើរទៅមក និងចេញចូល ទើបធ្វើឱ្យមានបរិយាកាសល្អ សម្រាប់ផាសុខភាព៕
