(ភ្នំពេញ)៖ លោកស្រី រាជ ផាវឿន ចៅសង្កាត់ និងជាប្រធានគណៈបញ្ជាការឯកភាពរដ្ឋបាលសង្កាត់ទួលសង្កែទី១ បានធ្វើការជូនដំណឹងជាថ្មីម្ដងទៀត ដោយទុកឱសានវាទ ត្រឹមថ្ងៃទី០១ ខែធ្នូ ឆ្នាំ២០២៥ ខាងមុខនេះប៉ុណ្ណោះ ដើម្បីឱ្យបងប្អូនក្រុមអាជីវករមួយចំនួន ដែលបាននឹងកំពុងរំលោភយកចំណីចិញ្ចើមផ្លូវ និងទ្រូងផ្លូវសាធារណៈ មកដាក់តាំងលក់ដូរ ប្រកបអាជីវកម្មផ្សេងៗ និងការចតយានជំនិះ គ្មានសណ្ដាប់ធ្នាប់ ត្រូវបញ្ឈប់ជាបន្ទាន់ និងត្រូវរុះរើ និងលើកចេញរាល់ឧបករណ៍ និងសម្ភារទាំងឡាយ។

ការជូនដំណឹងជាថ្មី សម្រាប់ឱសានវាទនេះ បានធ្វើឡើងក្នុងពេលលោកស្រីប្រធានគណៈបញ្ជាការឯកភាពរដ្ឋបាលសង្កាត់ បានអញ្ជើញដឹកនាំកម្លាំងមន្ត្រីពាក់ព័ន្ធ ចុះរៀបចំសណ្ដាប់ធ្នាប់ និងរបៀបរៀបរយសាធារណៈ នៅតាមបណ្ដោយផ្លូវ៥៩៨ (ហៅផ្លូវជាសុផារ៉ា) ត្រង់ចំណុចផ្សារទំនប់ (ហៅផ្សារងិនអាន) ក្នុងភូមិទួលគោក សង្កាត់ទួលសង្កែទី១ ខណ្ឌឫស្សីកែវ រាជធានីភ្នំពេញ នាព្រឹកថ្ងៃទី២៩ ខែវិច្ឆិកា ឆ្នាំ២០២៥ ក្រោយពីទទួលបានផែនការតាមរយៈកិច្ចប្រជុំ ពីសំណាក់លោក ជិន ប៊ុនធឿន អភិបាលខណ្ឌឫស្សីកែវ និងជាប្រធានគណៈបញ្ជាការឯកភាពរដ្ឋបាលខណ្ឌ។

បើតាមលោកស្រីប្រធានគណៈបញ្ជាការឯកភាពរដ្ឋបាលសង្កាត់ទួលសង្កែទី១ ចំពោះរាល់សកម្មភាពចុះរៀបចំសណ្ដាប់ធ្នាប់ និងរបៀបរៀបរយសាធារណៈ ដើម្បីរំដោះចំណីចិញ្ចើមផ្លូវ និងទ្រូងផ្លូវពីក្រុមអាជីវករ ប្រកបអាជីវកម្មផ្សេងៗ ក្នុងមូលដ្ឋាននេះ គឺបានអនុវត្តឡើងជាបន្តបន្ទាប់ ទាំងការជូនដំណឹង និងការអនុវត្តវិធានការជាក់ស្ដែង ក្នុងគោលបំណងជួយម្រួលមួយផ្នែកដល់ការធ្វើចរាចរណ៍ កាន់តែងាយស្រួលជាងមុន ពោលគឺការកាត់បន្ថយការកកស្ទះ និងជួយលើកកម្ពស់ដល់សោភ័ណភាពរាជធានី ដែលមានសណ្ដាប់ធ្នាប់ និងអនាម័យ បរិស្ថានល្អ ប្រកបដោយផាសុខភាព ហើយបើក្នុងករណី បងប្អូនអាជីវករ «មិនចូលរួម មិនស្ដាប់ និងមិនសហការជាមួយអាជ្ញាធរមានសមត្ថកិច្ចនោះទេ» ប្រកដណាស់ និងត្រូវប្រឈមជាមួយវិធានការរដ្ឋបាលមិនខានឡើយ ដោយធ្វើការដកហូតរាល់ឧបករណ៍ និងសម្ភារ ដែលបានដាក់តាំងលក់ផ្សេងៗ និងមិនទទួលខុសត្រូវលើការខូចខាត ឫបាត់បង់នោះឡើយ៕