(ភ្នំពេញ)៖ លោក ចេង មុនីរ៉ា អភិបាលខណ្ឌសែនសុខថ្មី បានដាក់ចេញនូវរបៀបវារៈ សំខាន់ៗចំនួន៤ ដើម្បីអនុវត្តឱ្យមានប្រសិទ្ធភាព ពិសេស លើការផ្តល់សេវាសាធារណៈ ជូនប្រជាពលរដ្ឋ ពោលគឺ «ធ្វើឱ្យបាន ធ្វើឱ្យលឿន ធ្វើឱ្យមានតម្លាភាព»។
របៀបវារៈ ដែលដាក់ចេញចំនួន៤នេះ បានធ្វើឡើងដោយមានការចូលរួម ពីថ្នាក់ដឹកនាំ នៃអាជ្ញាធរមានសមត្ថកិច្ចពាក់ព័ន្ធខណ្ឌ-សង្កាត់ និងមន្ត្រីមួយចំនួនទៀត នៅក្នុងកិច្ចប្រជុំគណៈបញ្ជាការឯកភាពរដ្ឋបាលខណ្ឌសែនសុខ រាជធានីភ្នំពេញ នាថ្ងៃទី២០ ខែវិច្ឆិកា ឆ្នាំ២០២៥។
នៅក្នុងកិច្ចប្រជុំនេះ និងក្នុងនាម ប្រធានគណៈបញ្ជាការឯកភាពរដ្ឋបាលខណ្ឌសែនសុខ លោក ចេង មុនីរ៉ា បានផ្ដោតសំខាន់លើរបៀបវារៈ ដែលបានគ្រោងទុក ចំនួន៤ រួមមាន៖ ១-ការអនុវត្តគោលនយោបាយភូមិ-សង្កាត់ មានសុវត្ថិភាព។ ២-ការផ្តល់សេវាសាធារណៈ ជូនប្រជាពលរដ្ឋ ធ្វើឱ្យបាន ធ្វើឱ្យលឿន ធ្វើឱ្យមានតម្លាភាព។ ៣-ការចូលរួមមតិយោបល់របស់សមាជិក សមាជិការអង្គប្រជុំ។ ៤-ទិសដៅសម្រាប់ការអនុវត្តខែធ្នូ ឆ្នាំ២០២៥៕
