(ភ្នំពេញ)៖ លោក ជិន ប៊ុនធឿន អភិបាលខណ្ឌឫស្សីកែវ និងជាប្រធានគណៈបញ្ជាការឯកភាពរដ្ឋបាលខណ្ឌឫស្សីកែវ នាល្ងាចថ្ងៃសុក្រ ទី១៩ ខែកញ្ញា ឆ្នាំ២០២៥នេះ បានដឹកនាំកិច្ចប្រជុំកម្លាំងចំណុះគណៈបញ្ជាការឯកភាពខណ្ឌ ស្ដីពីសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម ក្នុងឱកាសពិធីបុណ្យកាន់បិណ្ឌ-ភ្ជុំបិណ្ឌ និងពិធីបុណ្យកឋិនទាន នៅរាជធានីភ្នំពេញ។
កិច្ចប្រជុំនេះ មានវត្តមានចូលរួមពីសំណាក់លោកអធិការនគរបាលខណ្ឌ តំណាងលោកមេបញ្ជាការកងរាជអាវុធហត្ថខណ្ឌ គណៈអភិបាលខណ្ឌ គណៈនាយក លោក លោកស្រីប្រធានការិយាល័យទាំង១១ លោកចៅសង្កាត់ទាំង៧ មេប៉ុស្តិ៍សង្កាត់ទាំង៧ និងអង្គភាពពាក់ព័ន្ធ ព្រមទាំងមន្ដ្រី សរុបចំនួន៣៩នាក់។
នាឱកាសនោះ លោកអភិបាលខណ្ឌឫស្សីកែវ បានលើកឡើងថា ដើម្បីឱ្យពិធីបុណ្យខាងលើប្រព្រឹត្តទៅប្រកបដោយបរិយាកាសរីករាយបំផុត និងធានាសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយសាធារណៈ គណៈបញ្ជាការឯកភាពរដ្ឋបាលខណ្ឌ បានដាក់ចេញនូវផែនការដូចខាងក្រោម៖
-ទប់ស្កាត់សកម្មភាពបង្កការរំខាននានា ដែលអាចកើតមាននៅតាមទីវត្តអារាម រមណីយដ្ឋាន កន្លែង ប្រមូលផ្តុំតាមដងផ្លូវសំខាន់ៗ...។ល។ សំដៅរក្សាឱ្យបាននូវសណ្ដាប់ធ្នាប់សាធារណៈ ក្នុងពេលប្រារព្ធពិធីបុណ្យ កាន់បិណ្ឌ-ភ្ជុំបិណ្ឌ និងបុណ្យកឋិនទាន។
-ត្រូវប្រមូលផ្ដុំកម្លាំងគ្រប់ផ្នែកឱ្យបានគ្រប់ចំនួននៅតាមវេនប្រចាំការដែលបានកំណត់ មានការ បែងចែកកម្លាំងទៅតាមគោលដៅ តាមវេនពិសេសពេលយប់ ត្រូវមានការត្រួតពិនិត្យឱ្យបានម៉ត់ចត់ និងត្រូវ បង្កើនការរឹតបន្តឹងការអនុវត្តច្បាប់ចរាចរណ៍ផ្លូវគោក សំដៅកាត់បន្ថយហានិភ័យ នៃគ្រោះថ្នាក់ចរាចរណ៍ផង និងរួមចំណែកបង្ការ ទប់ស្កាត់សកម្មភាពបទល្មើសនានាផង។
-ត្រូវចាត់វិធានការការពារសន្តិសុខ សណ្តាប់ធ្នាប់ នៅតាមទីវត្តអារាម ក៏ដូចជាទីសក្ការៈបូជាផ្សេងៗ កន្លែងកម្សាន្តសប្បាយ និងរមណីយដ្ឋាននានា ដោយយកចិត្តទុកដាក់បង្ការ ទប់ស្កាត់មិនឱ្យកើតមានបទល្មើសផ្សេងៗ ជាពិសេសសកម្មភាពបង្កការអុកឡុកដោយក្មេងទំនើង និងត្រូវរៀបចំសណ្តាប់ធ្នាប់របៀបរៀបរយ ឱ្យបានល្អប្រសើរ។
-ត្រូវយកចិត្តទុកដាក់ចំពោះភារកិច្ច ដែលថ្នាក់ដឹកនាំប្រគល់ឱ្យ សម្រាប់ការទទួលខុសត្រូវចំពោះវេនប្រចាំការ ឬ គោលដៅរបស់ខ្លួន មានរបបរាយការណ៍ពីគោលដៅ ឬសកម្មភាពផ្សេងៗ ដែលកំពុងកើតមាន និងការ ចូលរួមសហការជាមួយកម្លាំងពាក់ព័ន្ធដទៃទៀតឱ្យមានភាពស្អិតរមួត ផងដែរ៕
