(ភ្នំពេញ)៖ លោក ថេង សុថុល អភិបាលខណ្ឌ៧មករា បានក្រើនរំលឹកដល់មន្ត្រីជាថ្មី ឱ្យយកចិត្តទុកដាក់បន្ថែមទៀត ចំពោះការងារផ្តល់សេវាសាធារណៈទាំងឡាយ ឱ្យបានល្អប្រសើរ តាមរយៈច្រកចេញចូលតែមួយខណ្ឌ-សង្កាត់ ជូនបងប្អូនប្រជាពលរដ្ឋ។
ការក្រើនរំលឹកនេះ បានធ្វើឡើងដោយមានការចូលរួម ពីថ្នាក់ដឹកនាំ នៃអាជ្ញាធរមានសមត្ថកិច្ចខណ្ឌ-សង្កាត់ និងមន្ត្រីមួយចំនួនទៀត នៅក្នុងកិច្ចប្រជុំគណៈបញ្ជាការឯកភាពរដ្ឋបាលខណ្ឌ៧មករា រាជធានីភ្នំពេញ នារសៀលថ្ងៃសុក្រ ១កើត ខែមិគសិរ ឆ្នាំម្សាញ់ ឆស័ក ព.ស.២៥៦៩ ត្រូវនឹងថ្ងៃទី២១ ខែវិច្ឆិកា ឆ្នាំ២០២៥។
នៅក្នុងកិច្ចប្រជុំនេះ និងក្នុងនាម ប្រធានគណៈបញ្ជាការឯកភាពរដ្ឋបាលខណ្ឌ៧មករា លោក ថេង សុថុល បានដាក់ចេញនូវផែនការសំខាន់ៗមួយចំនួន ដែលពាក់ព័ន្ធការផ្ដល់សេវាសាធារណៈ ពិសេស ចំពោះការងាររក្សាការពារសន្តិសុខ សណ្ដាប់ធ្នាប់ របៀបរៀបរយសាធារណៈ ក្នុងមូលដ្ឋានខណ្ឌ ដើម្បីធានាដល់សុខសុវត្ថិភាព របស់បងប្អូនប្រជាពលរដ្ឋ៕
