(ភ្នំពេញ)៖ ការអនុវត្តតួនាទី និងភារកិច្ចរបស់ការិយាល័យជំនាញទាំង១១ នៃរដ្ឋបាលខណ្ឌ៧មករា ត្រូវបានពង្រឹងឡើងវិញជាបន្តបន្ទាប់ ដើម្បីប្រសិទ្ធភាពការងារកាន់តែប្រសើរឡើង ពិសេសការយកចិត្តទុកដាក់ ក្នុងការបម្រើសេវាសាធារណៈទាំងឡាយ តាមរយៈច្រកចេញ-ចូលតែមួយ ជូនប្រជាពលរដ្ឋ។
នេះបើតាមលោក ថេង សុថុល អភិបាលខណ្ឌ៧មករា ដែលបានអញ្ជើញដឹកនាំកិច្ចប្រជុំមួយដើម្បីត្រួតពិនិត្យ ដោយមានការអញ្ជើញចូលរួមពីប្រធានការិយាល័យជំនាញទាំង១១ នៅសាលប្រជុំសាលាខណ្ឌ៧មករា រាជធានីភ្នំពេញ នារសៀលថ្ងៃព្រហស្បតិ៍ ១២កើត ខែភទ្របទ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី០៤ ខែកញ្ញា ឆ្នាំ២០២៥។
លោកអភិបាលខណ្ឌ៧មករា នៅក្នុងកិច្ចប្រជុំត្រួតពិនិត្យនេះ ពោលគឺដើម្បីធានាបាននូវសន្តិសុខ សុវត្ថិភាព សណ្ដាប់ធ្នាប់សាធារណៈ និងរបៀបរៀបរយល្អ ចាំបាច់ណាស់ទាមទារឱ្យមានកិច្ចសហការល្អជានិច្ច ពីអាជ្ញាធរមានសមត្ថកិច្ចពាក់ព័ន្ធខណ្ឌ-សង្កាត់ ក្នុងការយកចិត្តទុកដាក់ពង្រឹងចំពោះការងាររក្សាអនាម័យ បរិស្ថាន ការបង្កាទប់ស្កាត់រាល់គ្រប់បទល្មើសផ្សេងៗ ការត្រួតពិនិត្យអាវុធជាតិផ្ទុះ និងការងារគ្រប់គ្រងជនបរទេសរស់នៅក្នុងមូលដ្ឋាន៕
