(ភ្នំពេញ)៖ លោក ជិន ប៊ុនធឿន អភិបាល និងជាប្រធានគណៈបញ្ជាការឯកភាពរដ្ឋបាលខណ្ឌឫស្សីកែវ នាព្រឹកថ្ងៃចន្ទ ទី៨ ខែមិថុនា ឆ្នាំ២០២៦ បានអញ្ជើញដឹកនាំកិច្ចប្រជុំគណៈបញ្ជាការឯកភាពរដ្ឋបាលខណ្ឌ ស្ដីពីវឌ្ឍនភាពការងារគ្រប់គ្រង់ជនបរទេសស្នាក់នៅក្នុងមូលដ្ឋានខណ្ឌ និងការបង្ការ ទប់ស្កាត់ និងបង្រ្កាបបោសសម្អាតឱ្យអស់ពីក្នុងមូលដ្ឋានចំពោះបទល្មើស (Online Scam)។
នាឱកាសនោះ លោកអភិបាល និងជាប្រធានគណៈបញ្ជាការឯកភាពរដ្ឋបាលខណ្ឌឫស្សីកែវ បានសង្កត់ធ្ងន់ថា ដោយបានទទួលបទបញ្ជាដ៏ខ្ពង់ខ្ពស់ពី លោក ឃួង ស្រេង អភិបាល និងជាប្រធានគណៈបញ្ជាការឯកភាពរដ្ឋបាលរាជធានីភ្នំពេញ បានដាក់បទបញ្ជាឱ្យអាជ្ញាធររដ្ឋបាលខណ្ឌទាំងអស់ បន្តតាមដាន នឹងកំណត់មុខសញ្ញាជនបរទេស ដែលចេញចូលស្នាក់នៅក្នុងមូលដ្ឋាន ជាពិសេស គឺត្រូវបង្ក្រាបឱ្យអស់បទល្មើសឆបោកតាមប្រព័ន្ធបច្ចេកវិទ្យា (Online Scam)។
លោកបានសង្កត់ធ្ងន់ទៀតថា សូមឱ្យគ្រប់កម្លាំងអធិការនគរបាលខណ្ឌ កម្លាំងកងរាជអាវុធហត្ថខណ្ឌ កម្លាំងគណៈបញ្ជាការឯកភាពរដ្ឋបាលសង្កាត់ កម្លាំងប៉ុស្តិ៍នគរបាលសង្កាត់ កម្លាំងភូមិទាំងអស់ ត្រូវបន្តចែកវេនតាមដានត្រួតពិនិត្យការចេញចូលនៅតាមទីតាំងប្រមូលផ្តុំ រួមមាន ផ្ទះសំណាក់ សណ្ឋាគារ បន្ទប់ជួល និងអាគារខុនដូ ជាដើម ក្នុងករណីមានការសង្ស័យ ថាមានករណីជនបរទេសចេញចូលមិនស្របច្បាប់ ឬ អាចមានប្រព្រឹត្តបទល្មើស (OnlineScam) ត្រូវផ្ដល់ពត៌មានមករដ្ឋបាលខណ្ឌភ្លាម ដើម្បីបង្ការទប់ស្កាត់ ឬបង្ក្រាបបានទាន់ពេលវេលា។
ក្នុងករណីជនបរទេសទាំងនោះមានឯកសារគ្រប់គ្រាន់ ហើយមកជាលក្ខណៈទេសចរណ៍ ឫមកដើម្បីបំពេញការងារយ៉ាងណាក៏ដោយ គឺត្រូវបន្តតាមដាន ព្រោះអាចជាមុខសញ្ញា ដែលកំពុងបំលែងជារូបភាពផ្សេងៗដើម្បីប្រព្រឹត្តបទល្មើស (Online Scam) ផងដែរ៕
